ДАЛЕКУ ОД ДОМА

Понеделник до петок 21:00 Sitel TV

Актерите кои се прославија со легендарните улоги од "1001 ноќ" овојпат повторно заедно во нова приказна исполнета со љубов, војни и заговори.

Капетан Џевдет е храбар војник, гордост на својата татковина. Тој е истовремено сопруг, бескрајно вљубен во својата сопруга, убавицата Азизе, но и грижлив татко на своите деца и добар син на својата мајка. За време на балканските војни, испратен е во Солун да служи во одбрана на татковината. Ако некој би го прашал дали би избрал одданост кон родната земја или сопствениот живот, лесно би добил одговор. Но, доколку соборците и пријатели го прашаат дали татковината би ја ставил пред фамилијата, лесно не би добиле одговор.

Откако Џевдeт ќе замине далеку од дома да се бори на фронтот, за Азизе започнува тежок период во кој на сопствените плеќи ќе мора да ги носи и сопствениот, но и животите на свекрвата и своите три деца - Хилал, Јилдиз и Али Кемал.

За време на војната, Азизе ќе биде само мајка која ќе прави сѐ за да ги изведе децата на вистинскиот пат, а животот од корен ќе ѝ се промени откако ќе ја чуе трагичната вест. Џевдeт на бојното поле го дал животот за татковината. Несреќната вест ќе го распарчи нејзиното срце, но грижата за семејството е тоа што ќе мора да ја води понатаму.

Неколку години подоцна, Јилдиз станува убава млада девојка со високи цели за богато да се омажи, за Хилал смислата е во љубовта кон родното место и политичкиот ангажман, а Али Кемал е поразличен од неговите сестри. Тој е момче кој бесцелно талка, живејќи со љубовни болки и
тажната вистина за себеси која во меѓувреме ја спознава.

Тешка финансиска криза следува за Азизе и нејзините деца, чиј единствен излез е Тевфик, пријател на Џевдeт од детството кој сака да се ожени со Азизе и кој всушност го предал нејзиниот сопруг во војната. Додека Азизе се обидува да излезе на крај со проблемите на своите деца и
себеси, семејството го потресува и веста дека Грците го окупираат Измир.

Таа окупација, целосно неочекувано, ќе им ја врати личноста која ја сметаа за секогаш загубена. Ќе се врати нивниот татко и сопруг, Џевдeт, додека нивната татковина како феникс ќе се издигнува од пепелта.

Улоги: Halit Ergenc (Џевдет), Berguzar Korel (Азизе), Onur Saylak (Тевфик), Sebnem Hassanisoughi (Ефтелија), Celile Toyon (Хасибе), Kubilay Aka (Али Кемал), Miray Daner (Хилал).

Истанбулската невеста 

Понеделник до петок 19:45 SItel TV

Таа. Убава, храбра и талентирана.

Тој. Успешен, богат и заробен во стегите на минатото.

Суреја, скромна девојка од Истанбул ќе се вљуби во маркантниот Фарук. Љубовта станува бескрајна од првиот поглед, од првиот допир, од првите разменети зборови... па, за двајцата млади не преостанува ништо друго освен брак со кој ќе ја крунисаат својата голема љубов. Не знаејќи дека идниот сопруг од дете е фрлен во цврстите окови на традицијата, Суреја прифаќа да се омажи за Фарук, да ги спакува куферите и заедно со него да се пресели во Бурса во големиот конак на семејството Боран. Девојката од големиот град доаѓа во срцето на Анадолија, каде времето како да застанало. Влегува во големиот конак, во кој од секој ќош и секоја соба зрачи богатство, луксуз, но и длабоко вкоренети обичаи. Грандиозниот семеен имот и конак постојат веќе четири века, а доаѓањето на новата девојка ќе смени сѐ кое се одржувало и траело сето тоа време.

Истанбулската невеста ги запознава проблематичните Фикрет, Осман и Мурат, браќата на Фарук, но нејзиното неочекувано појавување во богатата палата особено внимание ќе предизвика кај госпоѓата Есма, мајката на Фарук. Таа е доминантна и сурова госпоѓа, на која ѝ се потчинети сите кои живеат и работат на големиот имот. Таа е челичната дама, чиј збор е прв и последен. И како таков, мора да се почитува, затоа што нема друг избор освен тој. Од среќна и безгрижна девојка, Суреја станува непосакувана снаа во конакот. Нејзината борба нема да биде лесна, затоа што таа не сака да се предаде пред отпорот на новата фамилија и суровата свекрва. Со сите сили ќе се бори за своето место во конакот како сопруга на Фарук Боран. Но, и Фарук од друга страна се соочува со непријатели и искушенија кои не ги очекувал, само затоа што довел невеста во домот, која не прилега за таква династија.

Како што минува времето, конакот ќе почне да се руши под притисокот на замрсените семејни односи, додека истанбулската невеста не биде целосно растргната меѓу традицијата и модерното време. Приказна која ги побива предрасудите и силно ги зближува вљубените души. Судбината ги водеше еден кон друг. Но, ќе постои ли некој кој може да ги раздели Суреја и Фарук? Ќе постои ли сила што може да ја разниша нивната блискост?

Улоги : Aslı Enver (Суреја), Özcan Deniz (Фарук), İpek Bilgin (Есма), Salih Bademci (Фикрет), Dilara Aksüyek (Ипек), Fırat Tanış (Адем), Özge Borak (Беѓум), Güven Murat Akpınar (Осман), Berkay Hardal (Мурат), Nergis Çorakçı (Ќијмет), Pelinsu Pir (Нурѓул), Semra Dinçer (Рејхан) и други​